Patrimonio: PANXOLIÑAS EN GALICIANA

PANXOLIÑAS EN GALICIANA

Documentos do século XVIII

O Nadal é un dos momentos do ano nos que se rexistran máis tradicións, hábitos e comportamentos que pasamos de xeración en xeración. Unha desas tradicións é a de cantar panxoliñas ou vilancicos, termos que poden ser practicamente sinónimos. Os vilancicos están relacionados sobre todo co nacemento de Xesús, mentres que as panxoliñas teñen un tema relixioso máis xeral.

Ler máis

 

A historia destas cancións remóntase varios séculos, cando non só eran cancións relacionadas co Nadal senón tamén cancións relixiosas en xeral, como demostran os exemplos que se poden atopar en Galiciana. Galiciana, a biblioteca dixital de Galicia, permite acceder a fondos bibliográficos dos arquivos galegos dende calquera lugar e con simplemente un par de clics na web do servizo.  Os seus fondos posibilitan facer un percorrido pola historia de Galicia e, por suposto, tamén deixan descubrir o pasado do Nadal galego. Se buscamos na hemeroteca do servizo, por exemplo, o termo 'villancico' (os xornais históricos foron publicados de forma principal en castelán), podemos atopar 1.154 entradas de novas e mencións publicadas entre os séculos XIX e XX na prensa diaria.

Navegando entre os fondos é posible atopar letras específicas de panxoliñas do século XVIII.

Así, entre os textos dixitalizados están as Letras de los villancicos que se han de cantar a la milagrosa V. y M. Sta. Lucia en la parroquial de San fructuoso, inclusa en la Santa Metropolitana Iglesia del Señor Santiago, publicada en Santiago en 1762 e que son cancións en honor de Santa Lucía, e as Letras de los villancicos que se han de cantar en los solemnes maytines del nacimiento de Nuestro Redemptor Jesu-Christo en la santa y apostólica iglesia del Señor Santiago unico y singular patron de España, tamén publicadas en Santiago pero en 1757. Estas últimas son as que máis se asemellan ao que hoxe coñecemos como panxoliñas ou vilancicos, xa que os textos están relacionados con personaxes e temáticas que hoxe asociamos a estas cancións.