Premio: I Premio Xestión Cultural Ana Goy Diz

María Regina Carreira López recibiu o I Premio en Xestión Cultural ‘Ana Goy Diz’ que outorga a Cátedra Institucional de Xestión Cultural da Universidade de Santiago de Compostela e que conta co apoio da Consellería de Cultura, Lingua e Xuventude da Xunta de Galicia. O premio concedéuselle pola súa tese de doutoramento ‘El rastro de la identidad: la representación de las migraciones atlánticas por medio de la indexación semántica de corpus textuales en documentos de archivo (1776-1939)’, defendida no programa de doutoramento en Estudos Culturais: Memoria, Identidade, Territorio e Linguaxe e cunha cualificación de sobresaliente cum laude con Mención Internacional.

O Premio en Xestión Cultural ‘Ana Goy Diz’ busca promover, recoñecer e difundir na sociedade galega estudos inéditos no campo da xestión cultural coa fin de contribuír á promoción da investigación e innovación no sector cultural en xeral e do patrimonio en particular. Ademais, con el preténdese ademais honrar a memoria e legado de Ana Goy Diz, catedrática de Historia da Arte da USC, académica de Belas Artes, representante en Galicia do Icomos, investigadora, difusora e dinamizadora do patrimonio cultural da provincia e da cidade lucense.