Nova: Anxo M. Lorenzo enxalza o papel das Rondallas de Vigo “na preservación do patrimonio inmaterial galego”
29/11/2025
Anxo M. Lorenzo enxalza o papel das Rondallas de Vigo “na preservación do patrimonio inmaterial galego”
O director xeral de Cultura presenta a oitava edición do concurso da área metropolitana da cidade olívica, que se celebrará o 17 de xaneiro
No certame participan este ano un total de 18 agrupacións, catro máis que no ano anterior
A cita incorpora dous concellos como novidade, Baiona e Redondela, que se suman a Vigo, Mos, O Porriño, Gondomar, Nigrán e Tui
Vigo, 29 de novembro de 2025
O director xeral de Cultura, Anxo M. Lorenzo, e a delegada territorial da Xunta en Vigo, Ana Ortiz, presentaron hoxe o VIII Concurso de Rondallas da Área Metropolitana de Vigo, que se celebrará o 17 de xaneiro de 2026 no Ifevi coa participación de 18 agrupacións, catro máis que na anterior edición.
Neste senso, o representante da Xunta destacou que a cita “volve contar co apoio do Goberno galego no marco do seu compromiso coa preservación e a posta en valor deste patrimonio inmaterial”. Así, resaltou o papel destas agrupacións na promoción e difusión da música e da cultura popular e gabou “o labor da Federación por conformar un colectivo que comparte a paixón por esta expresión artística, preservando un legado tan valioso”.
Ademais, Anxo M. Lorenzo, lembrou que o vindeiro xoves 11 de decembro estrease a película Rondallas, dirixida por Daniel Sánchez Arévalo, “que filmou algunhas escenas precisamente durante o certame do ano pasado”.
Na cita toman parte formacións de Vigo, Mos, O Porriño, Gondomar, Nigrán, Tui, Baiona e Redondela, estas dúas últimas como novidade nesta edición, que contan con arredor de 100 compoñentes cada unha, integrando características propias do patrimonio rondalleiro como son os diferentes tipos de música que combinan, a vestimenta de cada agrupación e o seu xeito específico de desfilar.