Nova: O ‘I+P, Ideas para producir’ reúne co apoio da Xunta un centenar de axentes audiovisuais arredor de 17 proxectos de cine e televisión

A Coruña, 28 de novembro de 2025

A 19ª edición do pitching  profesional I+P, Ideas para Producir, organizado polo Clúster Audiovisual Galego e patrocinado pola Xunta de Galicia, desenvólvese hoxe no Coruña Estudio Inmersivo (CEI) coa participación dun centenar de axentes do sector arredor da presentación de 17 proxectos que buscan o seu impulso diante de representantes de televisións, plataformas e distribuidoras.

A apertura da cita correu a cargo de Alfonso Blanco, presidente do Clúster, e contou coa participación de Jacobo Sutil, director da Axencia Galega das Industrias Culturais, quen na súa intervención salientou o papel do I+P: “Está demostrado que este foro supón unha excelente oportunidade para que compañías e creadores do país poidan achegar as súas propostas nunha contorna especialmente coidada e co decidido apoio Consellería de Cultura, Lingua e Xuventude”. Subliñou, ademais, o compromiso do Goberno galego cun desenvolvemento audiovisual sostido e internacionalizado, agradecendo a confianza das produtoras que acoden cada ano a esta xornada de pitching.

Máis de 6,5 M€ para o sector en 2026

Tamén fixo balance positivo dun ano de presenza do audiovisual galego en festivais, rodaxes e mercados, e avanzou algunhas das cifras previstas para o vindeiro exercicio no que respecta ás subvencións neste ámbito. “Desde o Goberno galego seguiremos a apoiar o sector en todas as fases de produción, para o que xa está disposto un investimento de máis de 6,5 M€ en 2026”, dixo.

Algunhas das dotacións das liñas de subvención previstas que detallou foron 3,5 M€ para produción e coprodución, 2 M€ para atracción de rodaxes, 310.000 euros para festivais cinematográficos, 300.000 euros para o desenvolvemento das fases iniciais dos proxectos ou 176.000 euros para promoción do talento.

Encontros profesionais ao longo do día

Tras o acto de apertura, o I+P Ideas para Producir levou a cabo no plató virtual do CEI o seu bloque central de presentacións rápidas, no que produtoras maioritariamente galegas presentaron os seus proxectos diante de representantes dunha vintena de compañías clave da industria, entre elas RTVE, Prime Video, Movistar Plus+, Mediaset, Atresmedia, DeAPlaneta, Zeta Studios, Filmax, Portocabo ou Siete Media. Ademais das intervencións individuais, a sesión incluíu encontros bilaterais dirixidos a favorecer acordos de produción, coprodución e circulación de contidos.

Neste pitching participan proxectos de diferentes formatos e xéneros, entre eles as longametraxes de animación Nora y la dama de Anboto (Abano Producións); de ficción Muere con estilo (Die With Style) (Avendaño Estudio), Lobos y corderos (Congo Producciones), Casus Belli (Mc Guffin Estudio Audiovisual), #elreto (Orlok Films) e Todos están muertos (Smiz and Pixel), e as longametraxes documentais La ciudad más fría (Filmakers Monkeys), Rumbo ás estrelas (Meteórica Cine) e Golpear a un coloso (Recrea Films). O apartado de series incluíu as propostas de ficción Spectrus (Arrivelo Producciones), Paco Jones… Yo! (Producións A Fonsagrada-Filmax) e Jesús & Eva (Tourmalet Films), así como as series de animación Becho (Artyc Content), Jesterina (Blend Studios) e Lola, Porco & Paco (Undodez Producións). Completaron a selección a miniserie de ficción Galdra-Jóvenes dragones (Borboligón Filmes) e a docuserie Incalculable (Tamboura Films).

A actividade insírese nun programa profesional que comezou onte xoves con tres sesións dedicadas ás novas tecnoloxías aplicadas á produción, ás vías emerxentes de financiamento e ás estratexias de contidos das plataformas e televisións. Entre elas, destacou a presentación das funcionalidades do propio Coruña Estudio Inmersivo, que por primeira vez acolle a celebración do I+P.