Nova: A Xunta axuda ao sector editorial galego con preto de 250.000 euros
11/11/2025
A Xunta axuda ao sector editorial galego con preto de 250.000 euros
O delegado territorial en Pontevedra visitou a empresa Técnicas & Gramaxe S.L, que foi unha das máis de 50 beneficiadas por estas axudas
Reguera destacou o compromiso da Xunta co sector cultural
Silleda (Pontevedra), 11 de novembro de 2025
O delegado territorial da Xunta en Pontevedra, Agustín Reguera, visitou esta mañá as instalacións da empresa Técnicas & Gramaxe SL., no concello de Silleda, que foi unha das beneficiadas polas axudas da Xunta para o sector editorial galego relativas a gastos de edición, distribución e comercialización das publicacións editoriais no ano 2025.
Técnicas & Gramaxe S.L, que recibiu preto de 6.500 euros ao abeiro destas axudas, foi unha das máis de 50 editoriais beneficiadas en toda Galicia por valor de preto de 250.000 euros.
O delegado territorial aproveitou a visita para poñer en valor o compromiso da Xunta co sector cultural e, “moi especialmente, co sector editorial que sempre desempeñou un papel imprescindible na conservación e difusión da nosa cultura, historia e identidade como galegos”.