Nova: López Campos erixe Galicia como “epicentro creativo” e “viveiro constante de novos artistas”

Santiago de Compostela, 27 de setembro de 2025

O conselleiro de Cultura, Lingua e Xuventude, José López Campos, erixiu hoxe Galicia como “epicentro creativo e viveiro constante de novos artistas”, dos que gabou “a súa proxección e recoñecementos dentro e fóra da Comunidade”. Así o salientou na inauguración da exposición Breviario, de Tamara Feijoo, na Fundación Dardo Instituto do Deseño e das Artes Contemporáneas-DIDAC, en Santiago de Compostela, unha mostra que xa foi exhibida no centro artístico Appletón de Lisboa e que conta co apoio da Xunta.

Acompañado polo director xeral de Cultura, Anxo M. Lorenzo, o representante do Goberno galego apuntou como exemplo desta “Galicia creativa” a carreira artística, premios e proxección da ourensá Tamara Feijóo, “cuxas obras se teñen exhibido por toda a Comunidade, ao tempo que en institucións de referencia de España ou de Portugal, como esta mesma mostra”.

Precisamente, López Campos enxalzou o currículo de Tamara Feijoo, da que lembrou que ten sido merecedora de recoñecementos en case todos os certames dedicados á promoción da arte en Galicia. De igual xeito, destacou o feito de que as súas creacións se atopan en importantes coleccións dentro e fóra da Comunidade, facendo unha mención especial a do Centro Galego de Arte Contemporánea.

Neste senso, o conselleiro celebrou o interese das e dos artistas galegos en dar a coñecer as súas obras na súa terra, ao tempo que valorou que, “nesa experimentación constante que define a moitos dos creadores actuais, sempre somos capaces de ver as nosas raíces na cerna das súas pezas”, tal e como asegurou que se reflicte en Breviario.

‘Breviario’

Breviario é unha pequena colección de pezas que funcionan como mostras e experimentos pictóricos. A mostra é o resultado de ensaios de taller, recorrencias e descartes, que dan forma a unha imaxinería persoal que funciona como resumo da súa traxectoria.

Neste particular compendio están presentes o debuxo e a pintura, os seus medios de expresión fundamentais. Desta forma, a artista utiliza papeis vellos e tocados polo paso do tempo provenientes de antigos cadernos que ela mesma vai recompilando para convertelos despois na base da súa obra.

Fundación DIDAC

Dardo Instituto do Deseño e das Artes Contemporáneas-DIDAC é unha fundación sen ánimo de lucro que nace coa intención de divulgar o deseño e as artes contemporáneas. Desde o seu nacemento, en 2017, caracterízase polo seu forte compromiso coa diversidade, a ecoloxía, a tradición e a innovación con Galicia como protagonista do seu relato.