Nova: A Xunta reforza a promoción do audiovisual galego no seu desembarco no Festival de San Sebastián

Santiago de Compostela, 20 de setembro de 2025

O audiovisual galego viaxa cara ao Festival Internacional de Cine de San Sebastián, onde a Xunta de Galicia desenvolverá diferentes accións para difundir o noso cinema e apoiar os seis filmes con participación galega seleccionados nesta edición: Rondallas e San Simón, que terán a súa estrea mundial no certame donostiarra, ademais de Sirat, Romería, Estrany riu e Ciudad sin sueño.

A principal destas actividades será o evento promocional programado para este luns día 22, ás 13,30 h. no restaurante Muka do Kursaal, sede principal do festival, ao que están convidados os principais axentes acreditados. O director da Axencia Galega das Industrias Culturais, Jacobo Sutil, asistirá a esta celebración, organizada pola Consellería de Cultura, Lingua e Xuventude baixo o selo Films from Galicia e no marco, así mesmo, da Galicia Film Commission.

Estreas de películas subvencionadas 

Xa o martes 23 terá lugar a estrea de Rondallas, filmada en diferentes localizacións da ría de Vigo ao abeiro do fondo convocado pola Xunta para a atracción de rodaxes á nosa Comunidade. A fita dirixida por Daniel Sánchez Arévalo proxectarase no Velódromo, que acolle as sesións máis multitudinarias do certame.

A outra estrea galega en San Sebastián será a que protagonizará o xoves 25 San Simón, longametraxe dirixida por Miguel Ángel Delgado e producida por Miramemira cunha das axudas da Xunta á produción e coprodución de proxectos audiovisuais galegos. O filme foi seleccionado dentro da sección Made in Spain, onde hoxe mesmo se proxectan outros dous títulos subvencionados pola Consellería de Cultura, Lingua e Xuventude: Sirat, de Oliver Laxe, que acaba de ser elixido para representar a España na carreira polos Oscar; e Romería, rodada por Carla Simón en Vigo e noutras localizacións da provincia de Pontevedra.

Completan esta representación galega Estrany riu, primeira longa de Jaume Claret Muxart e coproducida por Miramemira xunto á galego-catalá Zuzú Cinema e a alemá Schuldenberg Films, que chega á sección Zabaltegui-Tabakalera tras a súa estrea na Biennale de Cine de Venecia, e Ciudad sin sueño, unha coprodución na que participa a galega Sintagma e que tivo a súa presentación en primicia na Semana da Crítica de Cannes. No seu caso, foi seleccionada dentro do apartado Perlak.

Apartado profesional

A participación do noso cinema esténdese tamén ao apartado profesional deste prestixioso encontro internacional, dentro do que unha ducia de produtoras, emerxentes na súa meirande parte, foron convidadas a participar no programa Meet Them! en virtude da colaboración que a Consellería de Cultura, Lingua e Xuventude mantén co festival guipuscoano. Grazas a esta iniciativa, os representantes destas compañías teñen a oportunidade de ampliar a súa rede de contactos e de coñecer o festival de primeira man, ademais de se beneficiar da visibilidade que proporciona o apartado Industria Online na web oficial do certame.

Dentro da intensa axenda de actividades que desenvolve a delegación institucional e empresarial galega desprazada a San Sebastián na procura de novas oportunidades para o sector, destaca igualmente o encontro con Lucía Recalde, directora da Unidade Europa Creativa Media da Comisión Europea, ao que mañá domingo asistirá Jacobo Sutil en representación da Xunta de Galicia. O responsable da Axencia Galega das Industrias Culturais acudirá, así mesmo, á presentación do Coruña Estudio Inmersivo & Pedralonga Estudios que se celebra tamén mañá.

Axudas para a comercialización e difusión

O reforzo promocional á presenza galega nos eventos clave do circuíto cinematográfico internacional, como é o caso e San Sebastián, compleméntase cada ano coa convocatoria de subvencións para a comercialización e difusión de proxectos e obras audiovisuais e videoxogos en foros de negocio especializados e eventos de cine celebrados fóra da Comunidade.

A través desta liña, o Goberno galego contribúe á internacionalización das producións galegas cofinanciando tanto os custos da asistencia de empresas a mercados e feiras de referencia como a promoción dos filmes seleccionados nalgún dos máis destacados festivais a nivel mundial.