Nova: O festival The Wild celebra en Vigo unha nova edición de música, cinema e actividades na natureza co apoio da Xunta

Vigo, 28 de agosto de 2025

O festival The Wild presentou esta mañá en Vigo a súa sétima edición, que conta co apoio da Xunta de Galicia para a programación de música, cinema e diferentes actividades na natureza que terá lugar do 5 ao 7 de setembro no parque forestal de San Miguel de Oia.

A sede da Deputación Provincial de Pontevedra en Vigo acolleu esta presentación, na que interviñeron o director da Axencia Galega das Industrias Culturais, Jacobo Sutil, e a delegada territorial da Xunta en Vigo, Ana Ortiz, xunto a Luisa Sánchez, vicepresidenta da Deputación pontevedresa, e a Juan de Castro, en representación da organización de The Wild.

Sutil explicou que o encontro vigués é un dos subvencionados este ano pola Consellería de Cultura, Lingua e Xuventude no marco da convocatoria para a contratación de artistas e bandas galegas por parte de festivais profesionais de música, que distribuíu preto de 50.000 euros entre cinco citas: ademais de The Wild, Ateneo Barroco de Santiago de Compostela, Beatout Fest da Coruña, Encordass Fiddle Fest na illa de San Simón de Redondela e Murallón de Son en Silleda.

Promoción do talento galego

Na súa intervención, destacou que o principal obxectivo destas axudas é favorecer a participación da música galega de moi diferentes estilos en citas consideradas estratéxicas para o sector, incidindo así na visibilidade do talento galego e contribuíndo ao desenvolvemento das nosas industrias culturais a través da promoción dunha xestión máis profesional. Neste sentido, detallou que en 2024 esta mesma vía de apoio destinouse a 32 contratacións de 30 artistas e grupos galegos por parte dos catro festivais subvencionados desa volta.

Ademais, a Consellería de Cultura, Lingua e Xuventude investiu outros 270.000 euros nos patrocinios do Rompetiño, 17º Ribeira Sacra, Sinsal e SonRías Baixas a través da marca FEST Galicia. Ambas convocatorias responden á política de apoio do Goberno galego a eventos e festivais de música, da que tamén forman partes outras destacadas iniciativas como os Concertos do Xacobeo.gal.

No caso de The Wild, o representante da Consellería de Cultura, Lingua e Xuventude salientou a maioritaria representación galega, xa que agás Ilegales como cabeza de cartel, todos os grupos programados son do país. Así, polo escenario do festival vigués pasarán bandas consolidadas como Sr. Salvaje, Netta Rufina e Los Mortymer, ademais das emerxentes Supergigante, Exeria, Gargantúa e Martin Human. Estas últimas participarán na final do concurso Salvaxesons, que repartirá ata 1.800€ en premios para festexar o talento galego.

Formato multidisciplinar e sostible

O público asistente poderán gozar, así mesmo, doutras actividades lúdicas para todas as idades nun formato multidisciplinar, sostible e familiar. Entre elas, o clásico ciclo The Wild Cinema con filmes de natureza e aventura, as actuacións de Cé Orquestra Pantasma e Peter Punk Pallaso, as inéditas Olimpíadas Pallasas, unha andaina guiada e a xincana de orientación Orientaventura, a través das que se busca poñer en valor o parque forestal da parroquia viguesa de San Miguel de Oia.

The Wild procura ser tamén unha celebración da participación comunitaria ao colaborar coa veciñanza e a comunidade de montes, e promover o consumo local a través do mercado de artesanía e a zona gastro.

Este festival forma parte da campaña de verán promovida pola a Xunta de Galicia Para gustos, cultura, que conta con máis de 3.400 actividades en 200 concellos de 40 tipoloxías distintas que se levan desenvolvendo desde xuño e rematan en setembro.