Evento: Festival Intercéltico do Morrazo

Os amantes da música folk teñen unha nova cita co Festival Intercéltico do Morrazo, un dos encontros pioneiros na promoción e difusión deste tipo de música en Galicia, que celebrará a súa trixésima edición os días 25 e o 26 de xullo en Moaña.

Para encabezar o cartel deste ano, a organización do Intercéltico apostou por tres destacados embaixadores da música galega de raíz tradicional: Budiño, Luar na Lubre e Susana Seivane. Ademais, os novos talentos tamén terán cabida neste escenario, como é o caso do grupo coruñés SeisPorOito, que actuará en Moaña tras gañar o concurso para grupos noveis organizado polo festival. Así mesmo e como oferta paralela ás citas musicais, incorpórase unha feira de artesanía tradicional con vinte postos de venda que reunirán comerciantes chegados de diferentes puntos de España.