Evento: XX Festival de Cine Internacional de Ourense (OUFF)

Dez películas competirán na fase final do Festival de Cine Internacional de Ourense, que se celebrará entre o 14 e o 22 de novembro. Son “ La vida después” (Arxentina), “Bridgend” (Dinamarca), “The Sinking of Sozopol” (Bulgaria), “Dark Horse” (Reino Unido), “La novia” (España/Alemaña), “Bambanti” (Filipinas), “El comienzo del tiempo” (México), “La decisión de Julia” (España), “Techo y comida” (España) e Killing Time” (Francia/Bélxica).

A grande novidade entre os traballos finalistas da presente edición reside en que por vez primeira entran dous documentais, “Dark Horse” e “Killing Time”, que xunto co resto optan a seis premios: Mellor Película, Carlos Velo ao Mellor Director, Mellor Guión, Premio Especial do Xurado, Mellor Interpretación e Premio do Público. O valor total dos premios é de 17.000 euros. Tamén é novidade a destacada representación española, con tres películas: “La novia”, “La decisión de Julia” e “Techo y comida”.

A maioría das películas seleccionadas para a final son óperas prima ou segundas películas dos seus directores, en liña coa aposta do Festival polos novos valores do panorama cinematográfico. A vixésima edición recibiu 347 longametraxes (222 de ficción, 123 documentais e 2 de animación), procedentes dos cinco continentes, o que supón unha cifra superior á máxima acadada ata esta data, que estaba en 218 traballos. Asemade, hai que engadir 57 curtametraxes, o cal suma 404 presentados.

Nesta edición, o festival decidiu outorgar na presente edición o premio Cidade de Ourense ao director e guionista Enrique Urbizu, recoñecendo así a súa traxectoria profesional. Segundo o comité asesor do certame, o cineasta vasco “consolidou un labor profesional destacado, que foi acadando metas máis ambiciosas conforme foron pasando os anos”. A pesares da súa xuventude, conta cunha dilatada carreira cinematográfica coa que colleitou numerosos galardóns, entre os que destacan oito premios Goya, dous deles en 2002 con “La caja 507” e os outros seis con “No habrá paz para los malvados” (mellor guión, mellor dirección e mellor película). Ademais de cineasta, é profesor de Comunicación Audiovisual na Universidade Carlos III de Madrid.

Ademais, A vixésima edición do Festival de Cine Internacional de Ourense incorpora dúas novidades na programación que consisten en senllos ciclos titulados Cinemas de Galicia e XX Aniversario.