Evento: XXIV Festa do Melindre e da Reposteria Tradicional da Terra de Melide

Melide recende a doce dun xeito moi especial no segundo domingo de maio desde hai 23 anos. A Festa do Melindre e da Repostaría Tradicional da Terra de Melide ten lugar na Praza do Convento, punto onde se concentran os expositores.
Aínda que durante moitos anos se falou da Festa do Melindre, a exaltación estendeuse a toda a repostaría típica e tradicional de Melide e a súa comarca. Son tres os produtos que recollen a esencia da tradición reposteira na zona: o melindre, o rico e o amendoado.
Aínda que os melindres son os máis coñecidos (elabóranse con xema de ovo, fariña e azucre) e os amendoados tamén teñen merecida sona (clara de ovo, améndoa e azucre), son os “ricos“ os xenuínos de Melide. Os ingredientes desta saborosa galleta melidense son manteiga de vaca, fariña, ovos, azucre e anís.