O parque botánico do conxunto de San Simón cobrou unha gran personalidade grazas ás esculturas que poboan tanto exteriores como interiores completando o conxunto natural e escultórico. Na visita ao arquipélago podemos atopar obras de artistas como Francisco Leiro, Manolo Paz, Manuel Ferreiro Badía, Moncho Lastra, Silverio Rivas, Francisco Remiseiro, César Lombera, Manuel Coia, Sergio Portela ou Jorge Barbi.
Unha das obras máis coñecidas é o monumento parcialmente mergullado na ribeira leste da illa, que lembra o escritor Jules Verne e as súas Vinte mil leguas de viaxe submarina, do que son autores Moncho Lastra e Sergio Portela.
Outra das esculturas emblemáticas de San Simón é a dedicada aos trobadores do mar de Vigo, obra de Manuel Ferreiro Badía, dedicada a Meendinho, Martín Codax e Johán de Cangas. A Cruz de Parella, O ofrecemento da auga, Ventá ao futuro, Xoán sen medo ou San Ero son outras das numerosas esculturas integradas na paisaxe tanto exterior como interior, nunha coidada fusión de natureza e pedra que contrasta coas desoladoras imaxes do abandono no que estivo sumida a illa a partir dos anos sesenta.
