Evento: A veces creo que te veo

Unha estación de tren. Catro escritores observan o lugar desde diferentes puntos de vista. Nos seus ordenadores portátiles escriben en vivo o que ven na estación. E tamén escriben sobre outras cousas, ás veces persoais, ás veces inventadas, ás veces históricas. Todo o que van escribindo proxéctase en pantallas de vídeo. Os espectadores e os transeúntes ocasionais da estación de tren comezan ser parte da narración dos escritores. Cando miran as pantallas notan que se están a converter en personaxes dunha ficción escrita no momento. Os espectadores ven como os escritores crean unha sorte de novela en vivo tomando a realidade específica que os rodea. E á vez teñen a posibilidade de “actuar”, intervir esa ficción; son parte da creación colectiva dunha narración que reflexa un tempo e un espazo. Ao xeito dunha cámara de seguridade que rexistra todos os movementos de persoas anónimas no espazo público, cada escritor crea narracións instantáneas que reflicten o que ve ou imaxina sobre a xente e as posibles historias escondidas nese lugar de paso.

Mariano Pensotti

Mariano Pensotti (Bos Aires – 1973) formouse en cine, artes visuais e teatro. As súas obras foron presentadas en Arxentina e en festivais e teatros de Bélxica, Alemaña, Francia, Irlanda, Letonia, Brasil, Canadá, Xapón, Austria, España, Chile, Inglaterra, Dinamarca e Suíza. Polo seu traballo obtivo os premios Rozenmacher, Clarín e o Premio F; e as bolsas Unesco-Aschberg, Rockefeller Foundation, Fundación Antorchas e Casa de América de Madrid.