Evento: Florencio Delgado Gurriarán: Compromiso na distancia

A exposición mostrará ao público un material no que se entrelazan estas dúas realidades: o espazo onde se criou, que logo se transformaría no locus amoedus da súa literatura, e os poemas que este espazo inspirou. Será un percorrido pola obra do autor a través dos acontecementos vitais que conformaron o seu estilo e argumentario poético:

- Valdeorras, a bisbarra na que naceu: a aldea de Córgomo, a paisaxe vinícola, os castiñeiros, as aves, o río Farelos e o río Sil inspiraron o seu canto telúrico e sensorial.

- A emigración, primeiro á cidade (Ourense) e despois a Castela, Francia e México, morrendo en California en 1987.

- O compromiso co galego e coa consolidación do galeguismo político en Valdeorras.

- A súa participación durante e tras a Guerra Civil artellando a saída de refuxiados políticos cara América.

- O exilio en México e o seu labor na dinamización da cultura galega no exterior.

Florencio Delgado Gurriarán foi unha figura que soubo adaptarse aos cambios que a vida lle propuxo e que nos permite recuperar as memorias da emigración galega, do exilio, da comarca de Valdeorras no primeiro terzo do século XX e a recoñecer a influencia do autor en Galicia.

A exposición pode visitarse do 30 de maio ao 17 de xuño no vestíbulo da biblioteca no horario de apertura.