Evento: Espectáculo "As andainas dos Monifates e don Gaiferos"

Xa chegan Os Monifates!!!! Un peculiar carromato tirado por dous músicos ambulantes, cargado dos máis diversos e peculiares bailaríns (monicreques) que bailan ao son da música que interpretamos. Un día coñecen un simpático peregrino chamado Don Gaiferos e deciden percorrer con el o Camiño de Santiago. Xuntos irán parando nas vilas e lugares que atopen na súa traxectoria, nos que farán unha función para pedir esmola e así poder proseguir a súa viaxe ata Santiago de Compostela.

Esta singular troupe, está formada por once monicreques danzantes. Algúns bailan sós, outros en parella, chegando a bailar catro ao mesmo tempo manipulados por unha soa persoa. O obxectivo principal deste espectáculo, ademais da recuperación dos chamados monicreques danzantes, é darlle un enfoque didáctico co que poder mostrar a rica e variada música e a instrumentación tradicional que se conservan na cultura galega, mesturadas co baile e as historias dos nosos personaxes

Para público familiar a partir dos 6 anos. As persoas interesadas poderán retirar a súa invitación no mostrador de Información da biblioteca a partir das 18.00h.

Actividade realizada no marco do Fondo de Proxectos Culturais Xacobeo 21-22.