Evento: Premios María Josefa Wonenburger Planells 2020

O Goberno galego quere recoñecer as mulleres científicas de Galicia, que souberon adiantarse ao seu tempo e que abriron camiños a moitas outras. Así, con estes galardóns, outorgados anualmente pola Xunta de Galicia a través da Unidade de Muller e Ciencia, preténdese visibilizar e facer chegar á sociedade as contribucións feitas polas mulleres galegas á ciencia e á tecnoloxía.

O Premio leva o nome da investigadora e matemática galega María Josefa Wonenburger, unha autentica pioneira e referente feminino internacional no ámbito das ciencias e que foi unha científica adiantada ao seu tempo.

Dende a creación do Premio foron merecedoras deste recoñecemento mulleres que dedican a súa vida profesional a algún campo específico da ciencia ou da tecnoloxía, e así coa visibilización a través desta exposición da súa actividade e do seu triunfo, podemos lograr afianzar a idea de que muller e ciencia non só son compatibles senón que son unha combinación gañadora.