Evento: A cara oculta dos versos

A cara oculta dos versos é un proxecto expositivo, promovido pola Secretaría Xeral de Cultura, no que a artista Isabel Pintado amosa a súa creatividade sobre 21 libros de poesía de diversos autores e autoras, intervidos como unha homenaxe aos poetas que foron protagonistas das súas lecturas.

Obras de Manuel María, Chus Pato, Uxío Novoneyra, Yolanda Castaño, Manuel Antonio e Lupe Gómez son algúns dos autores e autoras que están presentes na mostra.

Coincidindo co Día da Poesía, a artista inaugura a exposición o día 21 de marzo, ás 19:00 horas, na Biblioteca Ánxel Casal de Santiago de Compostela, o primeiro punto dunha itinerancia que levará a exposición por bibliotecas das catro provincias.